მულტიელემენტების შემცველობის კვლევა სხვადასხვა მიკროზონის ევროპული და ტრადიციული ტექნოლოგიებით დამზადებულ ღვინოებში

ავტორი: თინათინ მელიქიძე
საკვანძო სიტყვები: მულტიელემენტები, მეღვინეობის მიკროზონები
ანოტაცია:

არქეოლოგიური მონაცემებით საქართველოში ღვინის დაყენების ისტორია ჯერ კიდევ 8000 წლის წინ დაიწყო და დღემდე გრძელდება. მულტიელემენტების შემცველობის გამო ღვინო შეიძლება განვიხილოთ როგორც ფუნქციური საკვები და სასარგებლო ფაქტორი ადამიანის ჯანმრთელობისათვის, რამდენადაც ღვინო მინერალური ნივთიერებების მნიშვნელოვანი წყაროა ორგანიზმის ნორმალური ფუნქციონირებისათვის აუცილებელი ელემენტების დღიური ნორმის შესავსებად. საქართველოს მრავალფეროვანი ბუნებრივი პირობები საუკეთესო გარემოს ქმნის მაღალხარისხიანი მევენახეობა-მეღვინეობის განვითარებისთვის, რომლის თავისებურებათა მიხედვით ქვეყნის ტერიტორია იყოფა ზონებად, ქვეზონებად და მიკროზონებად, რომლებიც განსხვავდებიან მოყვანილი ჯიშებითა და მათგან დამზადებული ღვინის გემოვნური თვისებებით, ასევე ღვინის დამზადებისას გამოყენებული ტექნოლოგიებით. ბიოლოგიურად აქტიურ ნივთიერებების გარდა (ეთანოლი, ორგანულ მჟავები, ფენოლური ნაერთები, შაქრები, სურნელოვან ნივთიერებები და ა.შ), ღვინო მდიდარია ვიტამინებითა და მინერალური ნივთიერებებით, რომლებიც მნიშვნელოვან როლს ასრულებენ ღვინის, როგორც ორგანოლეპტიკური მაჩვენებლების, გემოსა და არომატის, ასევე მისი სამკურნალო, დიეტური და კვებითი ღირებულების ჩამოყალიბებაში და განსაზღვრავენ ღვინის ხარისხს. სანაგისტრო კვლევის მიზანი იყო საქართველოს სხვადასხვა მიკროზონის (მუკუზანი, ყვარელი, ნაფარეული) ტრადიციული და ევროპული ტექნოლოგიებით დამზადებულ სხვადახვა ჯიშის (რქაწითელი, საფერავი) ღვინოებში მულტიელემენტების შემცველობის შედარებითი ანალიზი სხვასახვა ფაქტორების (მიკროზონა, ღვინის დაყენების ტექნოლოგია, ჯიში) ურთიერთქმედების გამოსავლენად. მიკროელემენტების რაოდენობა განისაზღვრა ინდუქციურად ბმული პლაზმურ-ოპტიკური ემისიური სპექტრომეტრით (ICP-OES). ჩატარებული ანალიზით დადგინდა, რომ მუკუზანის მიკროზონაში მოყვანილი მოსავლიდან წარმოებული ღვინო ყველაზე მდიდარია მიკროელემენტების შემცველობით. გამოვლინდა ღვინის დაყენების ტექნოლოგიის გავლენა ღვინოში მიკროელემენტების შემცველობაზე. ასევე გამოიკვეთა მიკროზონისა და ღვინის დაყენების ტექნოლოგიის კუმულაციური ეფექტი ღვინოში მიკროელემენტების შემცველობაზე, რაზეც მიუთითებს მუკუზანის ქვევრის ღვინოში მიკროელემენტების ყველაზე მაღალი შემცველობა. რაც შეეხება ყურძნის ჯიშებს, გამოკვლეულ ჯიშებიდან გამზადებულ ღვინოებს შორის მიკროელემენტების შემცველობის მიხედვით განსხვავება არ გამოვლინდა. კვლევის შედეგებმა ცხადყო, რომ მართალია მიკროზონა განსაზღვრავს უმეტესი მიკროელემენტების შემცველობას, გამონაკლისს წარმოადგენს Al, Pb და As, რომლებიც თანაბრად არის წამოდგენილი ყველა მიკროზონაში დამზადებულ ღვინოებში.